پسندے بھی برصغیر کے اعلیٰ کھانوں میں سے ایک ڈش سمجھی جاتی ہے۔ اس کی تیاری کا مرحلہ اسی وقت سے شروع ہو جاتا ہے جب کوئی فرد قصاب کی دُکان پر گوشت کی خریداری کرتا ہو۔ اس کے لیے عموماً ران کا گوشت استعمال کیا جاتا ہے جس کو پارچوں میں کٹوایا جاتا ہے۔ پھر ان پارچوں کو بغدے سے نہ صرف مزید چپٹا کرایا جاتا ہے بلکہ اس کی دھار سے گوشت کی اوپری سطح پر ہلکا سا کٹ بھی لگایا جاتا ہے تاکہ مسالا ان پسندوں میں رَچ بَس جائے۔ اس کا مسالہ بھی خاص انداز سے تیار کر کے دیر تک بھونا جاتا ہے۔ اور ہانڈی میں شوربہ کی مقدار خاصی کم رکھی جاتی ہے۔ یہ ڈش عام گھرانوں میں اعلٰٰی اور عمدہ کھانے کے طور پر تصور کی جاتی ہے۔ انتہائی لذیذ اور مقبول ڈش ہے۔