Description
تفصیل
گاؤن دراصل ایک خلعتی ملبوس ہے۔ یہ عموماً سرخ، سبز اور سیاہ رنگوں میں تیار کیا جاتا ہے۔ اس کو پہننے والے مخصوص امتیازی حیثیت کے حامل افراد ہوتے ہیں ، مثلاً کالج پروفیسرز، علماء کرام یا عدلیہ سے وابستہ افراد ۔ یہ کاندھوں سے لے کر گھٹنوں تک کا لبادہ ہے جو پشت کی جانب لٹکایا جاتا ہے اور گلے کے نزدیک ڈوریوں سے باندھا جاتا ہے۔ آستینیں عموماً لمبائی میں کم مگر پھیلی ہوئی ہوتی ہیں۔ اس کو استعمال کرنے والوں میں جج صاحبان، وکلاء، کالج ،یونیورسٹی کے اساتذہ کرام، ڈگری یافتہ طالب علم یا اعلیٰ ترین سرکاری عہدے داران بھی کبھی کبھار اس کا استعمال کرتے ہیں۔ اس میں خواتین اور حضرات دونوں شامل ہیں۔
ایک گاؤن ایسی بھی ہوتی ہے جو ہر فرد استعمال کرسکتا ہے مگر یہ محوّلہ بالا گاؤن سے مختلف ہوتی ہے، یہ ایک لمبے کوٹ کی مانند ہوتی ہے جو باریک، ریشمی اور دبیز کپڑے کی بھی ہوسکتی ہے۔ عموماً لوگ اسے غسل کے بعد استعمال کرتے ہیں یا رات کے اوقات میں اپنے کمرے میں سونے کے لیے استعمال میں لاتے ہیں،اس طرح کے گائون کو " سلیپنگ گائون" کہا جاتا ہے۔
آج کل گائون نما بُرقعے یا "عبایہ " کا رواج بھی ،حجاب کے طور پر کیا جارہا ہے۔
