ایک قسم کا خوشبودار پتّا جس کو ہندُستان میں روز مرہ یا بیاہ شادی وغیرہ میں کھاتے ہیں۔یہ ناگر بیل کا پتّا ہے جس کو کھانے سے منھ سُرخ ہو جاتا ہے۔ پان بیل کا تعلق Piperaceae خاندان سے ہے جو ایک سدابہار پھیلنے والا پودا ہے جس کے پتّے چمکدار، دل نُما اور کلیاں سفید ہوتی ہیں۔ جنوب اور جنوب مشرقی ایشیا پان بیل کی جائے پیدائش ہیں۔ اس کے پتّے ہلکے نشے اور طبی مقاصد دونوں کے لئے اہمیت کے حامل ہیں۔ پان بنانے کا عمل "گلوری تیّار کرنا" کہلاتا ہے جسے برصغیر میں آج بھی مہمان نوازی کی علامت سمجھا جاتا ہے۔پان بنانے سے مُراد کتھے،چُنے اور چھالیہ کے دانوں کو پان پر ڈال کر کھانے کے لیے پیش کرنا ہے۔میٹھا پان بھی مختلف قوام اور پِسے ہوئے ناریل وغیرہ سے تیّار کیا جاتا ہے۔