مشرق میں عرب ممالک سے متعارف یہ پراٹھا نہایت لذیذ اور مُرغن غذا ہے۔ اس کا مواد تیار کرنا ایک فن کا درجہ رکھتا ہے۔اس مقصد کے لیے بہترین میدہ کو دودھ میں گھولا جاتا ہے اور ساتھ میں چینی یا کوئی دوسرا میٹھا حسبِ ضرورت شامل کردیا جاتا ہے، پھر پھینٹا ہوا انڈا اس میں شامل کر کے دیر تک یک جان کیا جاتا ہے تاکہ تمام اجزاء آپس میں اچّھی طرح مِل جائیں ۔ یہ سارا مواد لزوجی شکل میں( شہد کی طرح) تیار ہو جاتا ہے۔ پھر فرائی پان یا توے پر تھوڑا سا کوئی بھی روغن گرم کر کے کسی بڑے چمچے کے ذریعہ تیار شُدہ مواد کی کچھ مقدار ڈال کر فرائی پان کو ہلکا سا ہلایا جاتا ہے تاکہ یہ گاڑھا مائع توے کی سطح پر پھیل جائے ۔اس کے بعد روٹی یا پراٹھے کی طرح اس کو پَلٹا جاتا ہے اورسُرخ ہونے پر توے سے اُتار لیا جاتا ہے۔ یہ انتہائی لذیذ روٹی ہے ۔اس پراٹھے کو کسی بھی سبزی،ترکاری یا سالن کی ضرورت نہیں ہوتی۔چاے کے ساتھ یا یُوں ہی کھایا جاسکتا ہے۔