یہ وہ پوشاک ہے جو بادشاہ یا اُمراء بطور عزت افزائی خاص افراد کو عطا کیا کرتے تھے۔ اس لباس کے ساتھ شملہ‘ چکن پٹکا‘ دو شالہ اور بڑا رومال ہوتا تھا۔ مگر بڑے عہدیداران اور سردار، صوبےدار یا باج گذار علاقوں کے اُمراء کو حسبِ مراتب سات‘ نو‘ گیارہ اور اکیس پارچے کا خلعت بھی عطا ہوتا تھا۔ اکیس پارچے کا خلعت عام طور پر صرف ولی عہدِ سلطنت کو عطا کیا جاتا تھا۔ خلعت میں بنیادی لبادہ وہ خوبصورت قبا ہوتی ہے جو پوشاک کے اوپر پہنی جاتی ہے اور پہننے والے کو دوسرے افراد سے نمایاں رکھتی ہے۔