پنجاب کا خوبصورت اور مقبول ترین لباس لاچا ہے۔ عموماً یہ ریشمی کپڑے کی ایک لمبی چادر ہوتی ہے۔ جسم کے زیریں حصّہ پر پہنا جاتا ہے۔ بظاہر دھوتی کی طرح کولہے اور ٹانگوں کے گِرد لپیٹ کر ناف کے اوپر چادر کے دونوں سِروں سے ایک گانٹھ دے کر اس کے پَلُّو درمیان میں سے اُڑس لئے جاتے ہیں مگر پَلُّو کے کنارے لٹکے ہوتے ہیں جو کُرتے سے نیچے تک باقاعدہ دکھائی دیتے ہیں۔ چادر کی چوڑائی خاصی ہوتی ہے جس کی بناء پر یہ ٹخنوں سے نیچے تک اور اگلا سِرا پیروں میں جُوتے کی نوک تک لٹکا ہوتا ہے۔ خوبصورتی کے لئے یہ طرح طرح کے ڈیزائنوں میں تیار کیا جاتا ہے۔ عموماً پنجاب کے متموّل اور ٹھاکر گھرانوں کے افراد اس لباس کو استعمال کرتے ہیں۔پنجاب کی ثقافت میں لاچا خواتین اور حضرات دونوں کا پسندیدہ لباس سمجھا جاتا ہے۔