لُنگی برِصغیر کے بہت سارے علاقوں کا پسندیدہ اور عام پہناوا ہے۔ کثرت سے لُنگی جہاں استعمال ہوتی ہے اس میں پنجاب ، جنوبی ہند، بنگال، بہار، یو۔پی اور سی پی کے علاقے شامل ہیں۔ یہ مختلف رنگوں میں استعمال ہوتی ہے البتہ اس میں استعمال ہونے والے کپڑے کے دونوں سِرے سلے ہوئے ہوتے ہیں پھر پہنتے وقت اس میں عورتوں کی ساڑھی(ساڑی) کی طرح درمیان میں کپڑے کی تہہ جما کر فال بنائی جاتی ہے اور ناف کے اوپر اس فال کا سِرا اُڑس لیا جاتا ہے۔ لُنگی کا کپڑا باقاعدہ ایک علیٰحدہ قِسم کا حامل ہوتا ہے۔ مشرقِ بعید، جاپان، چین، فلپائن اور کوریا میں بھی اسی شکل کا لبادہ خواتین اور مردوں میں پہنا جاتا ہے۔ اسی طرح افریقہ کے بہت سارے ممالک اسی قسم کے پہناوے کو عام گھریلو زندگی میں استعمال کرتے ہیں اور خاص خاص مواقع پر اس کی نمائش کا اہتمام بھی کیا جاتا ہے۔ اپنے اپنے خِطّوں اور طرزِ معاشرت کے لحاظ سے اس کے باندھنے کا انداز مختلف ہے۔ اس کا میل عموماً کُرتے کے ساتھ ہوتا ہے۔ کُرتے بھی مختلف علاقوں کے اپنے اپنے رسم و رواج کے لحاظ سے تبدیلی کا مظہر ہوتے ہیں۔ مذہبی کتابوں میں بھی مختلف مذہبی شخصیات اور پیغمبروں کے پہناووں میں لُنگی کا تذ کرہ موجود ہے۔