آرائیں میاں فیملی، لاہور (پاکستان) کی ایک معزز فیملی ہے۔ اس خانوادے نے پاکستان کی سیاست میں بڑا اہم کردار ادا کیا ہے۔ مغلیہ عہدِ حکومت یا اس سے بھی پیشتر اس خانوادے کا کردار ایک نمایاں اہمیت کا حامل رہا ہے۔ تاریخی طور پر اس خاندان کو ’’میاں‘‘ کا خطاب مشہور مغل بادشاہ شاہجہان نے سرکاری طور پر عطا کیا تھا جو ان کی دیرینہ خدمات کے عوض اس کے اعتراف میں عطا کیا گیا تھا۔ یہ خاندان اسی خطاب کے ساتھ باغبان پورہ (لاہور) کی میاں فیملی سے مشہور ہے۔ یہی خاندان سرکاری طور پر شالیمار باغ کے رکھوالے کے طور پر اس وقت کے مغل بادشاہ شاہجہان کے عہد سے یعنی 1641ء سے آج تک چلے آرہے ہیں۔ آرائیوں کی خاصی بڑی تعداد پنجاب میں آباد ہوئی اور اس خاندان کے تمام افراد ’’میاں‘‘ کا خطاب اپنے نام کے ساتھ فخریہ استعمال کرتے ہیں جو ان کا طرہ امتیاز ہے۔ آرائیں جو مشرقی پنجاب سے ہجرت کرکے پاکستان آئے ان کی بڑی تعداد امرتسر، جالندھر، گوداستپور، فیروزپور سے متعلق ہے اور انہوں نے لاہور میں سکونت اختیار کی یا پھر ملتان میں مقیم ہوئے۔ یہ دور 1947ء کا ہے جب انڈیا سے پاکستان کی تقسیم عمل میں لائی گئی۔