مرزا یا میرزا لُغوی اعتبار سے ’’ امیر زادہ‘‘ کا مخفف ہے ، شاہ زادہ ، رئیس زادہ ، مُغل زادہ کے علاوہ ’’میرزا‘‘ مغلوں کا بھی لقب ہے ۔ خاندانِ مُغلیہ کے شاہ زادوں کا لقب بھی ’’میرزا یا مِرزا ‘‘ ہے ۔ مرزا عموماً مغلوں کے ہاں خاندانی نام کے طور پر مستعمل رہا۔ مرزا آقا، سردار یا جاگیردار کے معنوں میں بھی استعمال کیا جاتا رہا ہے۔ پاکستان میں یہ (مرزائی) نام (خطاب) استہزائیہ/حقارت سے ’’جماعتِ احمدیہ‘‘ کے افراد کے لئے بھی استعمال کیا جاتا رہا۔ دراصل یہ مرزا غلام احمد قادیانی (پیشوا احمدیہ سلسلہ) سے نسبت قرار پانے کی بنیاد پر بولا جاتا رہا۔ تاریخی اعتبار سے مغل ’’بیگ‘‘ کا لفظ اپنے نام کے آگے لگاتے رہے ہیں اور آج بھی مغل افراد ’’بیگ‘‘ ہی کہلاتے ہیں لیکن ان میں مزید ممتاز حیثیت کے حامل افراد’’ مرزا‘‘ بھی استعمال کرتے ہیں۔ یعنی ’’مرزا‘‘ اور’’ بیگ‘‘ ۔مغل فرماں روا نصیرالدین محمد ہمایوں کا ایک بھائی کامران مرزا کے نام سے تاریخِ پاک و ہند میں ملتا ہے جسے لاہور (پنجاب )کی حکومت ملی تھی۔ایک روایت کے مطابق ’’مرزا‘‘ ذات کے افراد ’’تیموری‘‘ (مُغل) ہوتے ہیں۔