لومڑی عام طور پر ہمہ خور جانور ہے جو دودھ پلانے والے جانداروں میں شمار کی جاتی ہے۔ یہ Canidae خاندان سے تعلق رکھتی ہے۔ اب تک لومڑی کی 23 اقسام دریافت ہوچکی ہیں۔ اس کی جسامت درجِ بالا گروہ سے تعلق رکھنے والے دوسرے حیوانات (جیسے بھیڑیا‘ گیدڑ اور کتّا) سے چھوٹی ہوتی ہے ۔ یہ دبلی پتلی ہوتی ہے اور اس کی کھوپڑی کسی حد تک لمبوتری ہوتی ہے۔ لومڑی کی تھوتھنی لمبی ‘ ٹانگیں چھوٹی مگر مضبوط ہوتی ہیں۔لومڑی کے کان بڑے اور لمبے ہوتے ہیں اور اس کی دُم گھنے بالوں کی وجہ سے پھولی ہوئی ہوتی ہے۔ یہ جانور گروہ کی شکل میں نہیں رہتا بلکہ تنہائی پسند ہے۔ یہ موقع پرست جانور ہے جو اپنی خوراک چوری ‘ عیاری اور چالاکی سے چُھپ کر حاصل کرتا ہے۔ اس کی خوراک میں بڑے جانوروں کا بچا کھچا شکار بھی شامل ہے۔ لومڑی اپنی خوراک کو آڑے وقتوں کے لئے زمین میں دفن کرکے محفوظ کر لیتی ہے۔ لومڑی اپنی چالاکی اور مکاری کی بناء پر مشہور ہے۔ لومڑی کی کھال سے بنی ہوئی ٹوپیاں (سمُوری) دنیا بھر میں مشہور ہیں۔ اُردو لغت میں کنایتاً عیّار ، مکار ،فریبی،دغا باز ، چال باز اور دھوکہ باز آدمی کو بھی " لومڑی" کہا جاتا ہے۔بچوں کے ادب میں لومڑی "چالاکی" اور "مکّاری" کا استعارہ بن چکی ہے۔